Ene madame dans Iddat et hajj

Ene madame ki so missié fine mort, bizin attane ene morceau jour avant ki li re-décide pou marié. Ça attane-là appelle reste dans Iddat. Iddat pou ene madame ki so missié fine mort, c’est 4 mois 10 jours. A moins si li enceinte, alors li bizin attane juska l’accouchement.

Coumsa même ene madame ki so missié fine donne li ene ou deux ou trois talaaq, bizin reste dans Iddat pendant so trois périodes. A moins si li enceinte, alors li bizin attane juska l’accouchement. Ene madame ki pas gagne période ou bien ki fine arrête gagne so période, bizin attane 3 mois en cas si so missié donne li talaaq, pou so iddat fini

Ene madame ki dans Iddat pou la mort so missié ou bien pou talaaq ki li fine gagné, pas gagne droit alle faire hajj tanque ki so Iddat pas terminé.      

Ene madame ki perna mahram et hajj

Ene madame li pas gagne droit alle faire hajj li tout seule. Li bizin ena ene zomme ki accompagne li. Ça z’homme-là li bizin soit so missié ou bien ene l’autre z’homme ki li pas gagne droit marié avec li jamais, couma so papa, dada, nana, mamou, chacha, frère, neveu etc. Ou capave habitué avec ene z’homme combien ou content. Ou capave estime li et li aussi li estime ou couma so soeur, kala, maman, tifi etc. mais si li pas ou mahram d’après shariah, alors l’amitié ou estime ki chakene ena pou so camarade, pas capave faire li vine ou mahram.

Ene madame ki li ena le moyen mais ki perna ene mahram pou accompagne li, pas gagne droit sorti depi dans so la caze pou alle faire hajj. Si malgré ça li alle faire hajj, li pou sorti dans désobéissance et dans la colère Allah Ta’ala. Li pas ene hajj Maqboul. Li pas ene hajj ki Allah Ta’ala pou accepté. Li vraiment ene gaspillage pou faire autant z’effort et finalement trouve ou hajj pas fine accepté. Nou bizin faire Allah Ta’ala so Ibaadat d’après le principe ki nou Nabi r fine enseigne nou. Concernant ça, Rasouloullah r fine dire:

 

“Faudré pas ene madame faire hajj sans ki li ena ene mahram avec li ..........”

(Darqoutni/ Al- Bazzaar)

 

KHADIJAH (RADHIYALLAHU ANHA)

Khadijah (Radhiyallahu Anha) ti premier parmi banne épouses de Rasulullah (Swallallahu alaihi wasallam). Au moment so mariage, li ti ena quarante ans et Prophète (Swallallahu alaihi wasallam) ti ena vingt-cinq ans. Li fine donne naissance à tout banne enfants de Nabi (s.a.w) à l’exception, Ibrahim.
So premier mariage ti prévu avec Waraqah bin Naufal mais sa mariage la pas fine realiser.li fine marier donc avec Ateeq bin Aaiz et depuis sa premier mariage la, li fine gagne ene ti fille qui ti appelle Hind. Hind fine grandit li fine accepter islam et li fine vine maman plusieurs enfants plus tard.
Quand so premier mari fine mort, Khadijah (Radhiyallahu Anha) fine marier avec Abu Haalah et li fine gagne deux enfants : Hind et Halah. Hind fine vivre jusqu'à Khilaafat de Hazrat Ali (Radhiyallahu Anhu).
Quand Abu Halah fine mort, Rasoulullah (Swallallahu alaihi wasallam) fine marier avec, Khadijah (Radhiyallahu Anha) qui fine vine Nabi (s.a.w) so premier madame. Li fine mort pendant le mois Ramadhaan, dans deuxième l’année nubuwwat a l’âge de soixante-cinq ans.
Rassoulullah (Swallallahu alaihi wasallam) ti bien content li et li pas fine marier avec aucaine madame aussi longtemps qui khadija (Radhiyallaahu anha) ti encore la.
Même avant Islam, banne dimoune ti ena l’habitude appelle li ‘’Twahirah’’ (celui qui propre et pure). Banne zenfants ki li fine gagner avant ki li marier avec Nabi (Swallallahu alaihi wasallam) ti appelle Banu Twahirah. So banne vertus et qualités exceptionnelles fine mentionner longuement (dans banne hadith).
Nabi (Swallallahu alaihi wasallam) fine dépose li dans qabr avec so propre la main. Namaz janaaza pas ti encore en vigueur sa l’époque la.

Voyage tout seul pou ene madam

"لا تسافر المرأة ثلاثة ايام الا مع ذى محرم"

(البخارى)

Traduction:

“Ene madame faudré pas li voyage (ene distance) trois jours sans ki li ensemble avec ene mahram.” (Saheeh Boukhari)

Explication:

Ene distance trois jours veut dire ene distance ki ene voyageur capave couvert dans trois jours. Dans l'époque longtemps dimoune ti pé voyage lors chameau. Donc ene distance trois jours signifié ene distance ki ene dimoune capave couvert dans trois jours par chameau. Couma nou conné ki zotte pas ti pé voyage 24 lors 24, c'est necque ene parti dans ça 24 hrs là ki zotte ti pé voyagé. Dans ça ene parti voyage-là, zotte ti pé couvert 16 miles par jours. Donc ene distance de trois jours c'est 48 miles. Zordi jour nou ena banne moyen transport bien bien rapide. Ça distance ki zotte ti pé prend 3 jours pou couvert li longtemps, zordi avec facilité ki nou ena, nou capave faire li dans trois minutes aussi. Ceki important là-dans c'est ça distance-là, pas ça trois jours-là. Donc ene madame pas gagne droit voyage ça distance-là sans être accompagné par ene mahram, quand même li faire li dans pli tigite le temps ki ça 3 jours-là.

 Ki veut dire mahram ?

Ene mahram pou ene madame c'est ene zomme ki ça madamelà pas gagne droit marié avec li jamais couma madame-là so papa,so garçon, so banne ti zenfants, so frère, so neveu, banne zenfants so neveu ou bien banne zenfants so nièce, so nana, so dada, so mamou, so chacha. Ça li appliqué pou tous madame en general. Quant à ene madame marié, alors soit li accompagné de so missié ou bien ene dans ça banne-là. A noté ki beau-frère, poupa, kalou, cousin ou bien zenfants cousin cousine zotte pas mahram. Coumsa même banne grand dimoune ki ou appelle zotte nana, dada, mamou, chacha ou bien frère par l’amitié ou par respect, zotte continué reste étranger. Zotte pas vine ou mahram. Couma ene zomme li vine mahram pou ene madame par relation du sang, coumsa même li capave vine mahram par relation du lait aussi. C'est-à-dire quand ene ti baba boire du lait avec ene madame, alors ça madame-là so missié vine ça ti baba-là so papa du lait. Ça madame-là vine mama du lait. Madame-là so banne zenfants et banne lezot zenfants ki li fine faire boire du lait vine ça ti baba-là so banne frère sœur du lait. Coumsa même madame-là so frère vine ça ti baba-là so mamou du lait. Donc couma ene madame li gagne droit voyagé avec so propre garçon du sang, coumsa même li gagne droit voyage avec so garçon du lait. Mais dans tout ça-là li important ki ça ti baba-là fine boire du lait quand li pas ti encore gagne deux ans. Si jamais li boire du lait avec ene madame dans l’age après deux ans, alors ça boire du lait-là pas pou faire li vine garçon du lait ça madame-là. Ene mahram couma li bizin ene personne ki majeur, coumsa même li important ki li sain d’esprit. C'est-à-dire ene garçon mineur pas capave servi comme ene mahram dans voyage pou ene madame. Coumsa même ene personne ki pas sain d’esprit pas capave servi comme ene mahram dans voyage.

Dans ça hadice-là, Rassouloullah r pas fine spécifié aukene sorte de voyage. Donc ça li applique pou tout qualité voyage ki ene dimoune faire dans ene façon délibérée. Par exemple voyage de promenade, voyage de commerce et voyage de l’étude. Ça la loi-là li applique en général pou tout voyage. A moins si ena kit nécessité réelle. A ce moment-là li pou permette et li pou exempté de ça règle général-là. Par exemple ene madame ki ena pou alle à l’extérieur pou faire soigne li ou bien pou ene traitement médical ki perna cotte li dans so pays. Alors si li perna mahram, dans ça cas-là, exceptionnellement li gagne droit voyagé li tout seul.

Eski ‘oumrah ou bien hajj li ene nécessité ki autorise ene madame voyagé li tout seul sans mahram ? Le fait ki Rassouloullah r pas fine spécifié aukene sorte de voyage et li fine laisse li vague, alors de par so sens general li bizin applique pou ene voyage de ‘oumrah et de hajj également. Parceki perna aukene blâme lors ene madame si li pas fine réussi faire ‘oumrah ou bien hajj acoze ki li perna mahram. A noté ki tanque li perna ene mahram ki accompagne li, hajj pas vine obligatoire lors li pou accomplir. Si li pas réussi faire li dans so vivant, li bizin toujours fini faire ene testament pou ki so banne z’héritiers capave envoye kikene faire hajj de so coté après so la mort. Tout ça-là montré ki ‘oumrah et hajj li pas ene nécessité dans cas ene madame ki perna mahram. Alors ça hadice-là pou applique pou voyage ‘oumrah et hajj aussi, surtout quand d’après banne juristes couma Hassan Al-Basri, Ibrahim An-Nakhi-ï, Imaam Abou Hanifah, Imaam Ahmad, Ishaaq et Abou Thaur, hajj li pas vine obligatoire lors ene madame ki perna mahram.

Nou ena ene hadice dans Saheeh Boukhari rapporté par Hazrat Abdullah Bin Abbaas t ki confirme dans ene façon assez clair ki ene madame bizin être accompagné par ene mahram pou le voyage de hajj aussi. Selon ça hadice-là, Rassouloullah r fine dire dans ene certaine l’occasion :

لا تسافر المرأة الا مع ذى محرم ولا يدخل عليها رجل الا ومعها محرم

Ene madame faudré pas li voyagé sans ki ena ene mahram avec li. Ene zomme faudré pas li rente cote ene madame sans ki li (madame-là) ena ene mahram avec li.

Ene Sahabi ki ti là-bas fine demandé :

يا رسول الله انى اريد ان اخرج فى جيش كذا وكذا وامرأتى تريد الحج

O Allah so Rasoul (r) mo ti ena l’intention pou sorti dans tel ou tel l’armée. Et mo madame pé faire l’intention hajj ?

En réponse Rassouloullah r fine dire li :

اخرج معها

Alle ensemble avec li.

Explication :

Ça montré ki li bien important ki ene madame bizin être accompagné par ene mahram. Li pas gagne droit voyage li tout seul. Ça li tellement important ki Rassouloullah r fine ordonne le Sahabi pou abandonne l’intention sorti dans jihaad ki li ti déjà fini inscrire so nom, ziste pou li capave accompagne so madame dans hajj. Selon la version سعيد بن منصور, le Sahabi concerné ti faire نذر (vœux) pou li alle dans ça certaine jihaad-là. Par ordonne li pou accompagne so madame dans hajj, Rassouloullah r fine autorise le Sahabi concerné pou casse so promesse ki li ti faire pou sorti dans jihaad. Qour’aan et hadice fine mette boucou l’emphase lors la nécessité respecté ene promesse. Si malgré ça Rassouloullah r fine ordonne li pou abandonne ziska ça aussi, alors ça montré ki quantité li pli important ki ene madame pas alle hajj li tout seul sans être accompagné par ene mahram. Ça hadice-là montré ki l’ordre pou pas voyage sans mahram li applique pou voyage hajj aussi parceki ça sahabi-là fine comprend ça même et Rassouloullah r par so réponse fine confirme ceki le Sahabi fine comprend. Le hadice de Hazrat Abdullah Bin Abbaas t li dans Mousnad Al-Bazzaar aussi avec ene certaine différence :

عن ابن عباس  t ان رسول الله صلى الله عليه وسلم قال: لا تحج المرأة الا ومعها محرم فقال رجل يا نبى الله انى اكتتيت فى غزوة كذا وامرأتى حاجة؟ فقال ارجع فحج معها (البزار)

Hazrat Abdullah Bin Abbaas t fine rapporté ki Rassouloullah r fine dire :

Ene madame faudré pas li faire hajj sans ki li ena ene mahram avec li. Alors ene personne fine dire : “O Allah so Nabi (r) : Mo fine faire inscrire mo nom dans tel jihaad et mo madame pé alle faire hajj ? (Lors ça) Li (Rassouloullah r) fine dire : Retourné et alle faire hajj ensemble avec li.” (Al-Bazzaar)

Selon la version ki trouve dans (سنن الدارقطنى) avec ene sanad authentique, Rassouloullah r fine dire :

لا تحجن امرأة الا ومعها ذو محرم (سنن الدارقطنى)

“Ene madame pas bizin faire hajj sans ki li ena ene mahram avec li.” (Darqutni)

 

Hadice Hazrat Abou Umaamah t

 

عن ابى امامة قال سمعت رسول الله صلى الله عليه وسلم يقول: لا تسافر امرأة سفرا ثلاثة ايام او تحج الا ومعها زوجها (سنن الدارقطنى)

Hazrat Abou Umaamah (t) dire : Mo fine tanne Rassouloullah r dire : “Ene madame bizin pas faire ene voyage (ki duré) pendant trois jours ni li faire hajj sans ki li ena so missié ensemble avec li. ” (Darqutni)

 

Position hadice :

Li bon signalé ki ena ene rawi nommé جابر الجعفى (Jabir Al-Jou’fi) dans so sanad. Très souvent so présence dans ene sanad li servi comme ene prétexte par certain pou disqualifié le hadice. Mais en réalité li ene rawi ki so position li controversé. C'est-à-dire li correct d’après certains savants de hadice couma li faible d’après ene l’autre groupe. Ene rawi de ene tel position li ene rawi ki so hadice capave être considéré. Le moins ki nou capave dire c’est ki so hadice li pou ene hadice Hassan ki capave servi comme ene argument.

 

Deuxieme Hadice Hazrat Abou Umaamah t

لا يحل لامرأة مسلمة ان تحج الا مع زوج او ذى محرم (الطبرانى)

“Li pas permette pou ene madame musulmane ki li faire hajj excepté avec (so) missié ou bien avec ene mahram.” (Tabraani)

 Position hadice :

Ena ene rawi nommé ابان بن ابى عياش (Abaan Bin Abou Ayyaash) ki trouve dans sanad ça hadice-là. Selon banne savants de hadice, li ti pé faire erreur dans rapporte hadice acoze so mémoire ti bien faible. Mais ceki li fine rapporté li confirme ceki جابر الجعفى fine rapporté. Apart ça, ena hadice Hazrat Abdullah Bin Abbaas t aussi ki approuve ceki li fine rapporté. Ça prouvé ki malgré so mémoire faible, li fine bien rapporte ça hadice-là. Donc ene dans l’autre ça hadice-là li vine ene hadice Hassan pareil couma hadice de جابر الجعفى.

Explication :

 Hadice Hazrat Abdullah Bin Abbaas t et Hazrat Abou Umaamah t montré ki ene madame pas gagne droit faire hajj li tout seul. Ça li appliqué quand Makkah li trouve lors 48 miles ou plis ki 48 miles depi so l’endroit ki li resté. Quand même so missié donne li permission, là aussi li pas pou permette. Si hajj fine vine faraz lors li et li ena so mahram aussi ki pou accompagne li, alors gagne droit alle faire hajj, même si so missié pas autorise li. Dans ce cas li pas bizin obéir so missié. Si distance depi so l’endroit ziska Makkah li moins ki ça, alors pou ene hajj ki faraz, li gagne droit allé sans mahram. Mais pou ene hajj ki pas faraz, li bizin permission so missié pou li capave allé.

 Mise au point :

 Ena encore deux points ki dimane explication : 

1.     D’abord ena ene hadice ki faire mention de deux jours couma ena ene l’autre ki mentionne ene jour aussi. Banne hadices semblable zotte applique selon banne contextes et circonstances. C'est-à-dire cote ena sécurité et perna aukene danger, alors ene madame gagne droit voyage tout seul si li ene voyage de moins ki trois jours. Cote perna sécurité, alors li bizin être accompagné par ene mahram même si li ene ti distance aussi. Mais pou ene voyage de trois jours ou plis ki trois jours, de toute façon li bizin être accompagné par ene mahram, même si li paraite ki perna aukene danger ou l’insécurité aussi.

2.     Deuxièmement d’après ene hadice dans Saheeh Boukhari, banne madames de nou Nabi r ti accompagné par Hazrat Usmaan t et Hazrat Abdurrahmaan Bin Awf t dans hajj. Ça c’était par l’ordre Hazrat ‘Oumar t. En réalité ça li pas en contradiction ça hadice cote Rassouloullah r fine empêche ene madame sorti dans voyage sans être accompagné par ene mahram. C’est parceki banne madame Rassouloullah r fine déclaré comme mama de tous banne musulmans par Allah Ta’ala.

"النبى اولى بالمومنين من انفسهم وازواجه امهتهم ... (آية ٦/سورة الاحزاب)

 

“Nabi (r) li ena relation pli proche avec banne musulmans ki zotte ena avec zotte même et so banne madames c’est zotte mamans …” (S33/V6)

 

Alors banne musulmans, zotte banne mahram de banne madames Rassouloullah r. Dans ce sens li correct pou dire ki pendant zotte voyage de hajj, zotte ti accompagné de zotte banne mahram. Li pas ti ene voyage sans mahram. Et si malgré ça, zotte fine gagne l'ordre pou observe pardah, c'est par respect et dignité ki Allah Ta'ala fine accorde zotte.

TASBIH-E-FATIMI

Ene fois Ali (Radhiyallahu Anhu) fine dire avec ene so zéléve :

Est-ce qui to envie mo raconte toi ene incident de Hazrat Fatima (Radhiyallahu Anha), tifille préféré et bien-aimée de Rasoulullah (Swallallahu alaihi wasallam),          

Quand zélève  la fine réponde oui, Ali (Radhiyllahu Anhu) fine dire :

‘’Fatima (Radhiyallahu Anha) ti ena l’habitude pou craze banne la grains li même, sa ti pe faire ‘cores’ lors o lamain ;

li ti pe charrier de l’eau dans ene sac en la peau, sa ti pe laisse banne marques lor so l’estomac.

Li ti pe nettoyé la caze li même, so linge ti pe reste toujour sale.

Ene fois fine amène dans madinah quelques banne esclaves ki fine capturé pendant la guerre. Mo fine dire li :

Alle cotte Rasoulullah (Swallallahu alaihi wasallam) et dire li donne toi ene servante qui pou aide toi dans to banne travails la case ?’

Li fine alle cote  Rasoulullah (Swallallahu alaihi wasallam), mais li fine trouve beaucoup dimoune présent autour li.  Fatima (Radhi Allahu Anha) ti bien timide, li pas fine oser faire sa demande la en présence lezotte dimoune. Le lendemain Rasoulullah (Swallallahu alaihi wasallam) fine vine cotte nous et fine dire : ‘Fatimah (Radhi Allahu Anha) pou ki raison to ti vine cotte moi hier ?’ li fine gagne honteux et fine reste tranquille. Lerla moi mo fine dire,

O Rasoulullah ! fatima fine gagne ‘core’ lors so deux la mains et lor so l’estomac parce qui li bizin craze la farine et charrier de l’eau. Tout le temps, li occupé dans nettoye la case et faire encore lezotte l’ouvrage ; so linge reste toujours sale. Mo fine informe li à-propos banne esclaves qui fine arrive dans madinah et fine conseille li pou vine cote ou et dimanne ene servante.’’

Fine aussi rapporter qui Fatimah (Radhiyallahu Anha) li aussi fine faire sa demande la ki : ‘ Ali (Radhi yallahu Anhu) et moi ena ene seul la toile pou dormi et sa aussi c’est ene la peau cabri et nous servit li dans la journée pou mette manger chameau lor la. Rasulullah (Swallallahu alaihi wasallam) fine dire : Fatimah ! Prend patience, Nabi Musa (alaihis salam) et so madame ti ena ene seul couverture, c’était manteau Musa (alaihis salam). Gagne peur Allah. Développe la piété. Accomplit to banne devoir envers Allah et continuer faire to banne l’ouvrage la case. Quant to alle dormi, recite Sub-haanallah 33 fois, Alhamdu-lillaah 33 fois,et Allahu-akbar 34 fois, Sa pou profit toi plis qui ene servante.’’ Fatimah (Radhiyallahu Anha) fine réponde :’ mo satisfait avec sa qui faire plaisir Allah et so rassoul.’’

Guette ene coup ! Sa c’est la vie Fatimah (Radhi Allahu Anha), la fille bien aimée de Rasulullah (Swallallahu alaihi wasallam). Azordi jour, dans banne famille un peu riches, banne madames considère li contraire a zotte dignité pou faire l’ouvrage la case. Zotte rode toujours quicaine pou aide zotte, même dans zotte la sale de bain !  Couma l’époque fine changer !

Dans sa hadith la, finne prescrire sa Tasbih la avant dormi. Par contre, dans ene l’autre hadith, fine rapporter qui Rasulullah (Swallallahu alaihi wasallam) fine conseille Fatimah (Radhi Allahu Anha) pou récite après chaque namaz Sub-hanallah 33 fois, Alhamdu-lillah 33 fois, Allahu-akbar 33 fois et Laa-ilaaha-illallaahu Wah-dahou- laashareekalahu- lahul mulku walahul-hamdu wa huwa a’la kulli shay-in Qadeer, ene fois.

Haiz, couleur haiz etc.

Haiz

Haiz c'est ene saignement ki ene tifille ou ene madame gagné chaque mois. Ça saignement-là li vine depi dans l'utérus. Normalement li commencé apartir l'age de 9 ans. Ene saignement ki vine avant l'age de 9 ans li pas haiz. Et en principe ene madame li arrête gagne haiz après l'age 55 ans. Si jamais li trouve kitchose après l'age 55 ans, en principe ça li pas haiz. Amoins si li trouve ene couleur rouge ou bien couleur ki li ti habitué trouvé auparavant.

Li bon conné saignement ki ene madame gagné pendant so grossesse li pas compte dans haiz.

Durée minimum et maximum de haiz

Durée minimum pou haiz li 3 jours et so maximum li 10 jours. Ene saignement ki arrête avant 3 jours li pas compte dans haiz. Li bizin 3 jours au minimum et pas plis ki 10 jours.

Quand nou dire ki li bizin 3 jours au minimum, ça signifié ki depi ki li commencé ziska li arrêté bizin ena 3 jours ou bien 72 heures temps au minimum. Ça pas veut dire ki li pas capave arrête-arrêté au milieu mais pourvu ena 72 heures temps après depi li commencé ziska li arrêté. Par exemple ene madame fine trouve so premier saignement ene jour lundi à 6 heures du matin. Après ça li pas saigne du tout. C'est necque le jeudi 6.00 a.m ki li retrouve ene tigite saignement. Dans ça cas-là ça saignement-là li compte haiz parceki depi ki ça fine paraite ziska ki li fine arrêté, ena 72 heures. Par contre si ça saignement-là ti arrête avant 72 heures, ça pas ti pou compte haiz. Donc ene madame so haiz li varié entre 3 à dix jours. Pli moins li capave 3 jours et pli boucou li capave 10 jours.

Touhr

Touhr veut dire ene période de propreté dans laquelle ene madame pas trouve aukene saignement. Combien pli boucou le temps ene madame capave resté sans gagne haiz, ça li perna aukene limite. Li capave reste toute longue so la vie sans gagne haiz aussi.

Apart ça ena deux qualité touhr:

1.     Touhr sahih,

2.     Touhr fasid

Touhr sahih c'est ene période de propreté ki continué ziska 15 jours ou plis ki 15 jours.

Touhr fasid  signifié ene période de propreté ki durée ziska moins ki 15 jours.

Ene Touhr fasid ki vine entre deux saignement li couma dire saignement même. C'est-à-dire si ene madame fine trouve trace disang dans premier jour, après ça li pas trouve ditout. Lors dixième jour li resaigné. Dans ça cas-là li couma dire madame-là fine saigné pendant tous les dix jours. Ça veut dire ki madame-là fine gagne so période pendant dix jours malgré ki 8 jours au milieu là-dans li pas fine saigné ditout.

Coumsa même si ene madame fine saigné le premier jour et après ça pendant 14 jour li pas trouve aukene trace. Ensuite li resaigné ene jour, alors couma dire li fine continué saigné pendant 16 jours parceki la période de touhr li moins ki 15 jours. Et ça li compte couma saignement même. Dans ça cas-là si madame-là ena ene nombre de jours ki li habitué gagne so haiz, alors ça quantité jours-là pou compte haiz et le reste pou vine istihaazah. Mais si li fine gagne so haiz pou la première fois, alors 10 jours pou compte haiz et 6 jours pou vine istihaazah.

 

Touhr sahih

Par contre touhr sahih ou bien ene période de 15 jours ou plis ki 15 jours de propreté li compte ene véritable propreté. Li pas compte couma saignement. Quand ça qualité touhr ou propreté vine entre deux saignement, bizin considère tous les deux saignement séparément. Alors nou pou ena 4 possibilités:

Premier et deuxième saignement, tous les deux zotte 3 jours ou plis ki 3 jours. Dans ça cas-là tous les deux pou compte haiz.

Premier-là li 3 jours ou plis 3 jours et deuxième-là li moins ki 3 jours. Dans ça cas-là le premier saignement li compte haiz et le deuxième li compte istihaaza parceki haiz pas capave être moins ki 3 jours.

Premier-là li moins ki 3 jours et deuxième-là li 3 jours ou plis ki 3 jours. Dans ça cas-là premier-là li istihaazah et deuxième-là li haiz.

Premier et deuxième tous les deux zotte moins ki 3 jours. Dans ça cas-là tous les deux saignement zotte istihaazah. Narien na pas haiz là-dans.

Couleur haiz

Haiz li capave ene de ça 6 couleurs-là:

Rouge, noir, jaune, vert, couleur de l'eau sale, couleur la terre.

Bizin considère ça banne couleur-là au moment ki li encore humide. Par exemple si li jaune quand li humide mais li paraite blanc quand li vine sec, alors bizin li pou jaune. Bizin pas considère li blanc.

Apart couleur blanc, tout couleur ki ene madame capave trouvé pendant so banne jours de haiz, li compte haiz. Quant à ene madame ki fine arrive dans ene l'age avancé cote banne madames arrête gagne haiz, si fine trouve kitchose alors ça li pas haiz. Amoins si li trouve couleur rouge ou bien couleur noir ou bien ene couleur ki li habitué trouvé auparavant, alors ça li pou compte haiz si li continué pendant 3 jours ou plis ki 3 jours.

مبتدأة

مبتدأة c'est ene tifille ki fine gagne so haiz pou la première fois. Si li gagne so haiz normal alors li bon même. Pena aukene problème. Mais si so saignement fine dépasse 10 jours, alors c'est necque 10 jours ki pou compte dans haiz. Après 10 jours li pou compte istihaazah. Si jamais li continué saigné même, alors 10 jours dans chaque mois pou compte haiz et 20 jours istihaazah.

معتادة

معتادة (Mou'taadah) c'est ene madame ki ena ene nombre de jour fixe ki li habitué gagne haiz et ene nombre de jour fixe ki li habitué reste propre. C'est-à-dire li capave ena ene l'habitude de 3 à 10 jours de haiz et 15 ou 20 jours de propreté.

Changement dans l'habitude

Ene madame ki ena ene certaine nombre de jours ki li habitué gagne haiz, si jamais li fine gagne haiz plis ki ça nombre de jours-là dans ene certaine mois. Dans ça cas-là si so haiz arrête lors ene nombre avant 10 jours, alors banne jours en plis-là aussi pou compte haiz. Par exemple li ti habitué gagne haiz pendant 5 jours. Dans ene certain mois li fine gagne 6 ou bien 7 jours ou bien 8 jours ou 9 jours ou bien 10 jours. Mais li pas fine dépasse 10 jours. Alors banne jours en plis-là aussi pou compte haiz. Mais si li gagne plis ki so l'habitude et le dépasse 10 jours, dans ça cas-là la quantité jours ki li habitué gagné pou compte haiz. Le reste pou compte istihaazah. Par exemple li habitué gagne 6 jours. Dans ene certain mois li fine gagne li pendant 11 jours. Alors 6 jours pou compte haiz et le reste 5 jours pou compte istihaazah.

Istimraar-ud-Dam

Ça signifié ene saignement continuel et sans cesse.

Ene tifille ki saigné sans cesse dans la première fois même de so haiz, bizin compte 10 jours de chaque mois comme haiz et le reste 20 jours comme istihaazah.

Quant à ene madame ki ena ene nombre de jours fixe pou so haiz et pou so touhr bizin alle d'après so l'habitude. C'est-à-dire si li ena l'habitude de 8 jours haiz par exemple et li habitué reste propre pendant 20 jours, alors en cas si li déréglé, li bizin compte 8 jours depi ki li commence saigné comme haiz et 20 jours de propreté. C'est-à-dire après 8 jours li considère li propre pendant 20 jours. Et après chaque 20 jours li considère li dans haiz pendant 8 jours.

Depenser dans chemin d'Allah

Aishah (Radhi Allahu Anha) Dépensé Dans Chemin d’Allah

Ene fois Aishah (Radhiyallaahu Anha) fine gagne en cadeau deux sacs qui ti ena cent mille dirham. Li fine distribuer sa l’argent la parmi bannes pauvres et quand l’après midi fine arriver, même ene dirham aussi pas fine rester avec li. Li ti en état de roza sa jour la. Quand so servante fine amène ene morceau du pain et un peu de l’huile olive pou faire iftar alors servante la fine faire sa remarque la : 
‘’ Si seulement nous ti garde ene dirham, nous ti pou capave acheter ene ti peu la viande pou iftar.’’
Quand Aishah (Radhiyallaahu Anha) fine tanne sa li fine dire :

‘’Pas bizin chagrin astere, si to ti dire moi sa avant, peut-être mo ti pou garde ene dirham.’’

Aishah (Radhiyallaahu Anha) ti pe recevoir souvent banne cadeaux pareils depuis Ameer Mu’aawiyah, Abdullah bin zubeir (Radhiyallahu Anhum) et les autres banne sahabah etc. parce qui c’était l’époque facilité et l’abondance pou banne musulman cote la zotte ti pe conquérir territoire après territoire. Malgré sa l’abondance la, Aishah (Radhiyallaahu Anha) ti pe amène ene la vie privation et simplicité.

.

Leçon

Guette ene coup ! Aishah (Radhiyallaahu Anha) fine partage 100,000 dirham a banne pauvres, mais li pas fine même rappelle pou acheter un peu la viande pou so propre iftar. Azordi jour, dans nous l’époque (moderne), sa banne récits la paraitre impossible, mais pou banne personnes qui fine comprend l’état d’esprit banne sahabah (Radhiyallaahu Anhum), zotte trove banne incidents pareils tout à fait normal. Sa banne personnalités la fine accepter sacrifié zotte banne nécessites pou Allah so deen, mais malheureusement de nos jour banne madame possède plis ki bizin, la-aussi zotte pas pe trouve li suffit.